Plantun de Prouvènço

Pèr coumpara dos planto d'encò nostre

Orobanche minor & Rosa dumalis

Orobanche minor

Orobanchaceae

Noms en français : Petite Orobanche, Orobanche du trèfle.

Descripcioun :
L'asperjo-sóuvajo dóu gènre Orobanche, se rescontro sus li camin, dins lis ermas e li tepiero seco. Sa coulour èi proun chanjadisso, souvènt brunello emé de vióulet amé la tijo jauno coume eici o quàsi sènso coulour. Fai partido dóu group qu'a de péu glandoulous clar emé un estigmate rouginas. Lis estamino soun estacado de 2 à 3 mm de la baso de la flour e li fueio en escaumo soun en lanço (< 2 cm). Parasito forço planto diferènto (poulifajo).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : ges
Tipe bioulougico : Teroufite
Cicle bioulougico : Planto de l'an

Gènre : Orobanche
Famiho : Orobanchaceae

Ordre : Lamiales

Coulour de la flour : Brunello
Petalo : irreguliero
Ø (o loungour) flour : 13 à 20 mm
Flourido : Printèms - Estiéu

Sòu : Ca
Autour basso e auto : 0 à 1200 m
Aparado : Noun
Abriéu à juliet

Liò : Camin - Ermas - Tepiero seco
Estànci : Termoumediterran à Coulinen
Couroulougi : Eurimediterrano
Ref. sc. : Orobanche minor Sm., 1797

Agufié(-roso)

Rosa dumalis

Rosaceae

Àutri noum : Agoulencié, Agrufié, Agoulancié, Grato-quiéu, Tapo-cuou.

Nom en français : Églantier commun.

Descripcioun :
Aquel agufié, Rosa dumalis, trachis dins li relarg mountagnous e roucaious. Douno d'èr à Rosa canina, mai èi bèn mens coumun. Èi mai rabasset, emé de fueio souvènt verdalo e de flour pus acoulourido, roso vivo. La diferènci founso èi de vèire dóu coustat de l'ourifice calicinau qu'èi mai grand (>1/4 de la larjour, vèire la fotò). Aquel agufié-roso, presenta aqui èi Rosa dumalis s.s. (sènso glando sus lou pecou, dènt di fueioun coumpausado e sènso péu souto li fueio).

Usanço :
Tóuti lis agufié fan de fru (grato-cuou, agoulènço...), riche en vitamino C e anti-enflamatiéu, que soun bon à manja, majamen en counfituro.